កោះកុង៖ ឧទ្យានុរក្សនៃមន្ទីរបរិស្ថានខេត្តកោះកុង បានចុះស្រាវជ្រាវរកជនសង្ស័យដែលបានប្រព្រឹត្តអំពើព្រៃផ្សៃយកដំបងមកវាយសម្លាប់សត្វឈ្លូសដែលកំពុងហែលទឹកនៅចំណុចឆ្នេរកុកហាវ ស្ថិតក្នុងភូមិពាមកាយ ឃុំកោះស្ដេច ស្រុកគិរីសាគរ ខេត្តកោះកុង បណ្តាលឱ្យងាប់ភ្លាមៗ តាមរយៈវីដេអូឃ្លីបផ្សព្វផ្សាយយ៉ាងព្រោងព្រាតនៅតាមបណ្តាញសង្គមកាលពីថ្ងៃទី២៩ ខែតុលា ឆ្នាំ២០២៣។

តាមផេកហ្វេសប៊ុករបស់រដ្ឋបាលស្រុកគិរីសាគរនាថ្ងៃទី៣០ ខែតុលានេះ លោកអភិបាល នៃគណៈអភិបាលស្រុកគិរីសាគរ ចេង មុនីរិទ្ធ បានចាត់តាំងឱ្យអភិបាលរងស្រុក លោក ទួន ឪទី និងដឹកនាំកម្លាំង និងសហការជាមួយឧទ្យានុរក្សនៃមន្ទីរបរិស្ថានខេត្ត ចុះធ្វើការស្រាវជ្រាវរកជនសង្ស័យដែលបានប្រព្រឹត្តអំពើឃោរឃៅ។

អំពើដ៏ព្រៃផ្សៃនេះ ត្រូវបានមហាជនសម្តែងការសោកស្តាយ និងខឹងសម្បាយ៉ាងខ្លាំង និងសំណូមពរឱ្យអាជ្ញាធរចាត់វិធានការផ្លូវច្បាប់ឱ្យបានតឹងរ៉ឹងចំពោះបុរសដែលជាជនសង្ស័យ។

អតីតរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ក៏បានបញ្ចេញមតិហួសចិត្តចំពោះជនដែលប្រព្រឹត្តអំពើខុសច្បាប់លើសត្វដែលអភិរក្ស ដោយលោកបានសរសេរនៅក្នុងគណនីហ្វេសប៊ុករបស់ខ្លួនថា៖ «ប្រហែលមកពីចាស់? ថ្ងៃនេះបាត់អារម្មណ៍ល្អ ពេលឃើញខ្មែរយើងវាយសម្លាប់ឈ្លូសដែលខំហែលទឹកមករករស់ ខុសពីរូបមុនដែលឃើញបងប្អូននៅជាយក្រុងភ្នំពេញនាំគ្នាស្ទាក់ចរាចរណ៍ដើម្បីអោយពស់ថ្លាន់មួយឆ្លងផុតផ្លូវ»៕